नाट्यसंस्थांनी नाट्यक्षेत्रात नवनव्या प्रयोगातून समाजाची अभिरूची समृद्ध करावी : सुधीर मुनगंटीवार 

नाट्यसंस्थांनी नाट्यक्षेत्रात नवनव्या प्रयोगातून समाजाची अभिरूची समृद्ध करावी : सुधीर मुनगंटीवार 

• कलावंतांना प्रोत्साहन देण्यासाठी राज्यात 75 ठिकाणी नाट्यगृह उभारणार
• प्रत्येकी 5 कोटी प्रमाणे  386 कोटी रुपये निधी देणार
• प्रयोगशील नाट्यसंस्थांना अनुदान देताना मंत्री सुधीर मुनगंटीवार यांची घोषणा     

  मुंबई दि. ५/१२/२०२३  :  नाट्यसंस्थांनी नाट्यक्षेत्रात नवनवे प्रयोग करावेत आणि कलेचे क्षेत्र व समाजाची अभिरूची संपन्न करावी,  शासन नेहमीच ठामपणे नाट्यकला क्षेत्राच्या पाठीशी असेल, असे प्रतिपादन सांस्कृतिक कार्य मंत्री श्री सुधीर मुनगंटीवार यांनी आज केले. आज सह्याद्री अतिथिगृह येथे प्रयोगात्मक कलेच्या क्षेत्रातील नोंदणीकृत 41 संस्थांना मंत्री मुनगंटीवार यांच्या हस्ते सहाय्यक अनुदान धनादेश वाटप करण्यात आले, त्यावेळी ते बोलत होते.

ते पुढे म्हणाले की कलेच्या क्षेत्रातील संस्थांच्या माध्यमातून ग्रामीण भागातील कलाकारांना व्यासपीठ उपलब्ध करून दिले पाहिजे. यासाठी नोंदणीकृत संस्थेच्या माध्यमातून जे कलावंत प्रयत्न करत आहेत त्यांना प्रोत्साहन आणि संधी उपलब्ध व्हावी म्हणून तालुकास्तरावर 75 ठिकाणी नाट्यगृह उभारण्याचा निर्णय घेण्यात आला आहे. यासाठी  प्रत्येकी 5 कोटी प्रमाणे  नाट्यगृहासाठी 386 कोटी रुपये निधी देण्यात येणार आहे.

मंत्री मुनगंटीवार पुढे म्हणाले की, ज्या संस्था प्रयोगात्मक कलेचे जतन व संवर्धन करण्यासाठी कार्य करतात त्यांच्या शासन पाठीशी आहे. आपल्या संस्थांच्या थेट खात्यामध्ये पैसे जमा करता आले असते परंतु आपल्याशी संवाद व्हावा आणि राजाश्रय प्राप्त व्हावा यासाठी या कार्यक्रमाचे आयोजन करण्यात आले आहे. नोंदणीकृत संस्थेच्या माध्यमातून जे कलावंत प्रयत्न करत आहेत त्यांना मदतीचा हात शासनकडून  दिला जात आहे. आज विज्ञान युगात माहिती तंत्रज्ञानाचा प्रभाव आहे पण सुख समृद्धीचा अभाव दिसत आहे, समाधान लोप पावत आहे. कलावंतांनी राज्याचा सांस्कृतिक जप्त आपले काम सुरू ठेवावे शासन  आपल्या सोबत आहे, असेही मंत्री मुनगंटीवार यावेळी म्हणाले.

प्रधान सचिव विकास खारगे म्हणाले, महाराष्ट्राच्या संस्कृतीचे जतन व संवर्धन करण्याचे काम कलेच्या क्षेत्रातील या संस्था करतात आपले कौतुक करण्यासाठी या कार्यक्रमाचे आयोजन करण्यात आले आहे. महाराष्ट्राचे सांस्कृतिक वैभव जपण्याचे काम शासनासोबत आपणही करत आहात.

कार्यक्रमाची सुरुवात राज्य गीताने झाली. कार्यक्रमाचे प्रास्ताविक सांस्कृतिक कार्य संचालक विभीषण चवरे यांनी केले.

या कार्यक्रमास सांस्कृतिक कार्य विभागाचे प्रधान सचिव विकास खारगे, सांस्कृतिक कार्य संचालक विभीषण चवरे, सांस्कृतिक कार्य विभागाच्या उपसचिव नंदा राऊत तसेच प्रयोगात्मक कलेच्या क्षेत्रातील कार्य करणाऱ्या नोंदणीकृत संस्थाचे प्रतिनिधी उपस्थित होते.

धनादेश वाटप संस्थेची यादी खालील प्रमाणे

पटेल कल्चर फाउंडेशन मुंबई, वैभव सांस्कृतिक कला मंडळ नागपूर, अजित बालक मंडळ नागपूर, जय भीम डॉक्टर बाबासाहेब आंबेडकर स्मारक समिती रामटेक नागपूर या संस्थांना (प्रत्येकी 2 लाख रुपये.)

अय्यर फाउंडेशन मुंबई, संक्रीता फाउंडेशन मुंबई, प्रारंभ कला अकादमी ठाणे, तक्षशिला नृत्य कला मंदिर ठाणे, शाहीर शामराव खडके सांस्कृतिक लोककला मंडळ सावर्डी सोलापूर, जय भवानी कलापथक सांस्कृतिक मंडळ जवळा सोलापूर,सुंदरी सम्राट कै. सिद्राम जाधव सांस्कृतिक कला मंडळ सोलापूर, सप्तरंग थिएटर्स अहमदनगर, स्वानंद सांस्कृतिक मंडळ नागपूर, आदित्य बहुउद्देशीय संस्था रामटेक नागपूर, पिराजी बहुउद्देशीय संस्था नागपूर, ऑरेंजसिटी बहुउद्देशीय संस्था नागपूर, प्रेरणा अल्पसंख्यांक महिला बाल व युवक कल्याण सांस्कृतिक कला बहुउद्देशीय संस्था वाशिम या संस्थांना (प्रत्येकी एक लाख रुपये).

बोधी नाट्य परिषद मुंबई, श्री. वल्लभ संगीतालय मुंबई, विश्राम ठाकर आदिवासी कला अंगण चारीटेबल ट्रस्ट पिंगळी गुढीपूर सिंधुदुर्ग, मराठी साहित्य सांस्कृतिक व कला मंडळ नवी मुंबई, स्वप्निल सपना लोककला विकास मंडळ मानेगाव सोलापूर, स्व.वसंतराव चांदोरकर स्मृती प्रतिष्ठान जळगाव, चंदन युवक शिक्षण व्यायाम विकास क्रीडा मंडळ औरंगाबाद, श्रीकृष्ण सांस्कृतिक व ग्रामीण विकास संस्था नादरपूर औरंगाबाद, जय साई नटराज नाट्य चित्रपट कला व सांस्कृतिक संस्था औरंगाबाद, सामाजिक जनजागृती कला विकास औरंगाबाद, बालगंधर्व सांस्कृतिक कला क्रीडा व युवक मंडळ परभणी, स्वप्नरंग सांस्कृतिक संस्था सिने स्टार अकादमी नांदेड, मानवसेवा सामाजिक प्रतिष्ठान बीड, प्रगती सेवाभावी संस्था पाडळी बीड,

नटराज क्रीडा मंडळ नागपूर, रखुमाई सेवा मंडळ नागपूर, पंचरंगी निशाण  खडीगंमत मंडळ नागपूर,

जनजागृती कलंगी शाहीर मंडळ नागपूर, नागरी सांस्कृतिक व बहुसंस्था गोंदिया,स्व. विनायक राखोंडे प्रतिष्ठान पातुर, साने गुरुजी कला व सांस्कृतिक कार्य क्रीडा बहु मंडळ अकोला, शाहू फुले आंबेडकर फाउंडेशन बुलढाणा,लोकसेवा राष्ट्रीय सांस्कृतिक नाट्य मंडळ वाशिम, जय तुळजाई ग्रामीण बहु संस्था उमरसा यवतमाळ या संस्थांना (प्रत्येकी50 हजार) रुपयांचा धनादेश देऊन अनुदान वाटप करण्यात आले.